Avropa Qran Prisində ictimai nəqliyyat vasitələrinin – MARŞURUTU

Avropa Qran Prisində ictimai nəqliyyat vasitələrinin – MARŞURUTU

Avtobus və metro stansiyaları ümumilikdə 20 saat xidmət göstərəcək.

İyunun 17-19-da Bakı şəhərinin mərkəzi küçələrində baş tutacaq “Formula 1” Avropa Qran Prisi günlərində tamaşaçıların trekə, dənizkənarı bulvarda yerləşən “F1 Şəhərciyi”nə və bilet aldıqları tribunalara asan şəkildə yaxınlaşmasını təmin edəcək ictimai nəqliyyat vasitələrinin adları bəlli olub.

Bakı Şəhər Halqası Əməliyyat Şirkətindən (BŞHƏŞ) Oxu.Az-a daxil olan məlumata görə, yarış vaxtı Bakının mərkəzi küçələrində nəqliyyatın fasiləsiz hərəkətini təmin etmək məqsədilə hazırlanan nəqliyyatın idarə olunması planına əsasən, trekin yaxınlığından keçən avtobuslar və metronun müəyyən stansiyaları səhər saat 06:00-dan gecə saat 02:00-dək gün ərzində ümumilikdə 20 saat xidmət göstərəcək. 

Yarış həftəsi ərzində 65, 5 və 53 nömrəli avtobuslar müvafiq olaraq 5, 3 və 6 dəqiqəlik intervalla hərəkət edəcək.

Trekə gəlmək üçün 65 nömrəli avtobusun xidmətindən yararlanmaq istəyən tamaşaçılar Azərbaycan prospektində Mərkəzi Univermağın yaxınlığında yerləşən dayanacaqda enərək bilet aldığı tribunaya qədər piyada hərəkət etməlidirlər. 

Yarış vaxtı 65 nömrəli avtobus bu dayanacaqlardan keçəcək: Füzuli Meydanı-M.Muxtrov küçəsi-Nizami küçəsi-S.Rüstəmov küçəsi-Ə.Cavad küçəsi-Azərbaycan prospekti-Füzuli Meydanı-Z.Əhmədbəyov küçəsi-Tbilisi prospekti-20 Yanvar küçəsi-H.Məhərrəmov küçəsi-Mir Cəlal küçəsi.

Trekə 5 nömrəli avtobusla gəlmək istəyən tamaşaçılar Rəşid Behbudov ilə Nizami küçələrinin kəsişməsində yerləşən dayanacaqda enərək bilet aldıqları tribunaya piyada yaxınlaşmalıdırlar. Yarış vaxtı 5 nömrəli avtobusun keçəcəyi dayanacaqlar bunlardır: 

“N.Nərimanov” metro stansiyası-“28 May” metro stansiyası-Azadlıq prospekti-Nizami küçəsi- R.Behbudov küçəsi-“N.Nərimanov” metro stansiyası.

Trekə 53 nömrəli avtobus vasitəsilə gəlmək istəyən bilet sahibləri Bakı Əl Oyunları Sarayı qarşısında yerləşən dayanacaqda enərək bilet aldıqları tribunaya tərəf piyada getməlidirlər. Yarış vaxtı 53 nömrəli avtobus aşağıdakı dayanacaqlardan keçəcək: Bayıl (2-ci sahə)-Milli Bayraq Meydanı-Bakı Əl Oyunları Sarayı.

Bununla yanaşı, tamaşaçılar yarışın keçiriləcəyi məkana metro vasitəsilə də gələ bilərlər. Bunun üçün bilet sahibləri “28 May”, “Sahil” və “İçərişəhər” metro stansiyalarında düşərək trekə yaxınlaşa bilərlər.

Qeyd edək ki, yarış həftəsi ərzində şəhər sakinlərinin maneəsiz hərəkətini təmin etmək üçün trek ərazisində yerləşən daimi yeraltı keçidlər gün boyu açıq olacaq və bununla yanaşı, piyadalar trekin müəyyən yerlərində yeni qurulacaq müvəqqəti yerüstü keçidlərdən də istifadə edə biləcəklər. 

Müvəqqəti salınacaq yerüstü keçidlər Azərbaycan prospekti ilə İstiqlaliyyət küçəsinin və Xəqani ilə Rəşid Behbudov küçələrinin kəsişmələrində yerləşəcək.

Qeyd edək ki, iyunun 16-sı saat 14:00-dan etibarən yalnız bilet sahiblərinin dənizkənarı bulvara çıxışı olacaq. Şəhər sakinləri bu günlər ərzində sadəcə “Park Bulvar” alış-veriş mərkəzindən istifadə edə biləcəklər.

0
13