Xətai rayonunda bir-neçə küçə təmir olunur – FOTO + VİDEO

Xətai rayonunda bir-neçə küçə təmir olunur – FOTO + VİDEO

Yüksək keyfiyyətli asfalt-beton örtüyünün döşənməsi işləri aparılacaq.

Xətai rayonunda bir-neçə küçədə təmir-tikinti işləri aparılır.

“Azəravtoyol” Açıq Səhmdar Cəmiyyətindən Oxu.Az-a daxil olan məlumata görə, hazırda təmir-tikinti işləri Məzahir Rüstəmov və Telnov küçələrində, həmçinin  general Əliağa Şıxlinski küçəsinin bir hissəsində aparılır.

Məzahir Rüstəmov küçəsinin uzunluğu 1400 metr, eni 14 metr, Telnov küçəsinin uzunluğu 1340 metr, eni 13 metr, general Əliağa Şıxlinski küçəsində təmir işlərinin aparıldığı ərazinin uzunluğu isə 500 metr, küçənin eni 14 metrdir.

Sözügedən küçələrin hər birində köhnə asfalt-beton örtüyünün üst qatı qaşınaraq, ərazidən daşınıb. Bunun əvəzinə 2 qat olmaqla  yüksək keyfiyyətli asfalt-beton örtüyünün döşənməsi işləri aparılacaq. Ümumilikdə Məzahir Rüstəmov küçəsinin 20 min m2 sahəsi, Telnov küçəsinin 17 min 500 m2 sahəsi, general Əliağa Şıxlinski küçəsinin isə 7 min m2  sahəsi asfaltlanacaq.

Bundan başqa təmir-tikinti işləri çərçivəsində piyada səkiləri bərpa olunaraq, asfaltlanır, küçələr boyu yeni səki daşları düzülür. Ümumilikdə Məzahir Rüstəmov küçəsinə 2800 p/m, Telnov küçəsinə 2700 p/m, general Əliağa Şıxlinski küçəsinə isə 1000 p/m səki daşı düzüləcək.

Telnov və general Əliağa Şıxlinski küçələrinin kəsişməsində yerləşən dairənin ətrafında da təmir-tikinti işləri aparılır, asfalt-beton örtüyü yenilənir və dairənin kənarlarında olan köhnə səki daşları yeniləri ilə əvəzlənir.

Bu işlərə paralel olaraq səth sularının normal kənarlaşdırılması üçün nəzərdə tutulmuş yağış-kanalizasiya sistemi də bərpa olunaraq işlək vəziyyətə gətirilir, yağış barmaqlıqları yenilənir, yeraltı kommunikasiya xətlərinin dəmir-beton plitələri qaldırılaraq, yeni baxış qapaqları qoyulur.

İşlər yeraltı kommunikasiya xətlərinin çəkilişi ilə məşğul olan qurumlarla birgə aparılır. Zəruri olan yerlərdə yeraltı kommunikasiya xətləri yenilənir, yolun hərəkət hissəsindən kənara çıxarılır.

Bütün işlər “Azəravtoyol” ASC-nin rəhbərliyinin nəzarəti altında texnoloji ardıcıllığa riayət olunmaqla və yüksək keyfiyyətlə aparılır. İşlərin vaxtında yekunlaşdırılması üçün ərazilərə lazımi sayda qüvvə cəlb olunub.

0
15