Fond “Bank Standard”ın kreditorlarına müraciət etdi

Fond “Bank Standard”ın kreditorlarına müraciət etdi

1 saylı Bakı İnzibati-İqtisadi Məhkəməsinin 4 oktyabr 2016-cı il tarixli qərarı ilə QSC “Bank Standard” KB müflis elan edilib və Əmanətlərin Sığortalanması Fondu həmin tarixdən qeyd edilən bankın ləğvedicisi kimi fəaliyyətə başlayıb.

Fonddan Oxu.Az-a verilən məlumata görə, müflis elan edilmiş banka qarşı tələblər bu elanın dərcindən 60 təqvim günü ərzində ləğvedici tərəfindən yazılı şəkildə qeydə alınacaq.

Tələblərin qeydə alınması üçün kreditorlar öz tələblərinin hüquqi əsasını sübut edən sənədləri, eləcə də kreditorun adı, ünvanı, tələbin əsas məbləğində daxil edilən faizlərin və digər haqların məbləğləri, tələbin təminatı olan girov (ipoteka) və ya zəmanət barəsində məlumatları ləğvediciyə təqdim etməlidir.

“Kreditorlardan xahiş olunur ki, bu elanın dərcindən 60 gün ərzində bankın ləğvedicisinə müraciət etsinlər”, - deyə məlumatda vurğulanıb.

U.A.

0
6