Musiqili Teatrın keçmiş baş rejissoru vəfat edib

Musiqili Teatrın keçmiş baş rejissoru vəfat edib

Uzun müddət Azərbaycan Dövlət Musiqili Teatrında baş rejissor vəzifəsində işləmiş Yusif Əkbərov vəfat edib.

Bu barədə Oxu.Az-a Mədəniyyət və Turizm Nazirliyinin İnformasiya və ictimaiyyətlə əlaqələr şöbəsindən bildirilib.

Əkbərov Yusif Məmmədağa oğlu 2 sentyabr 1949-cu ildə Bakı şəhərində anadan olub. O, 1972-ci ildə M.A.Əliyev adına Azərbaycan Dövlət İncəsənət İnstitutunun rejissorluq fakültəsini bitirib və həmin il C.Cabbarlı adına Gəncə Dövlət Dram Teatrına quruluşçu-rejissor vəzifəsinə təyin olunub. Orada N.Hikmətin “Kor Padşah”, Ə.Kürçaylının “Qoruqlar” əsərini səhnələşdirib.

Hərbi xidmətdən sonra, 1974-cü ildə H.Ərəblinski adına Sumqayıt Dövlət Dram Teatrına quruluşçu-rejissor təyin olunub. 1987-ci ildən 1991-ci ilədək həmin teatrda baş rejissor işləyib.

Y.Əkbərov Sumqayıt teatrında “Əsrə bərabər gün”, “Bəxt üzüyü”, “Qınamayın məni”, “Qaravəlli”, “Bağdada putyovka var” tamaşalarına quruluş verib. 1991-ci ildən Azərbaycan Dövlət Musiqili Komediya Teatrında quruluşçu-rejissor, 2006-ci ildən 2014-cü ilədək baş rejissor vəzifəsində işləyib. Bu müddət ərzində Y.Əkbərov “Lotereya”, “Baş tutmayan hiylə”, “Qızıl toy”, “Hərənin öz ulduzu”, “Nəğməli Könül”, “Səhnədə məhəbbət”, “Əlin cibində olsun”, “Bir günlük siğə”, “Qısqanc ürəklər” tamaşalarına quruluş verib.

Prezident mükafatçısı idi, 2013-cü ildə Azərbaycan Respublikası Mədəniyyət və Turizm Nazirliyinin “Fəxri Mədəniyyət işçisi” döş nişanı ilə təltif olunmuşdu.

A.S.

0
7