Qubada 20 kəndlə rabitə əlaqəsi kəsilib

Qubada 20 kəndlə rabitə əlaqəsi kəsilib

Qubada güclü yağışlar nəticəsində yaranan sel rayonun telekommunikasiya sisteminə ciddi ziyan vurub.

Oxu.Az xəbər verir ki, Quba Telekommunikasiya Qovşağının rəisi Kamran Əhmədovun verdiyi məlumata görə, sel suları ümumilikdə 1400 metr fiberoptik, 800 metrə yaxın TPP kabelini sıradan çıxarıb, 30-a yaxın dirəyi isə su aparıb.

Nəticədə rayonun 20-yə yaxın yaşayış məntəqəsi ilə rabitə əlaqəsi kəsilib. Qonaqkənd-Söhüb, Küpçal-Qəçrəş, Zərqova-Çiçi, Xınalıq istiqamətindəki kəndlərdə fəaliyyət göstərən ATS-lər daha çox ziyan görüb.

Selin fəsadları nəticəsində Xınalıq kəndi ilə rabitə əlaqəsi tamamilə kəsilib. Dəniz səviyyəsində 2300 metr hündürlükdə yerləşən yaşayış məntəqəsində hazırda mobil operatorların xidmətlərindən belə yararlanmaq mümkün deyil.

Quba Telekommunikasiya Qovşağının əməkdaşları fəsadların aradan qaldırılması üçün fəaliyyətə başlayıb. Artıq Zərqova-Çiçi istiqamətində rabitə əlaqəsi bərpa olunub.

0
9