Dənizkənarı bulvarda açıq rəqs dərsləri keçirilir

Dənizkənarı bulvarda açıq rəqs dərsləri keçirilir

“Multikulturalizm ili” çərçivəsində Mədəniyyət və Turizm Nazirliyinin və Dənizkənarı Bulvar İdarəsinin birgə dəstəyi ilə A.Şaiq adına Azərbaycan Dövlət Kukla Teatrının arxasında rəqs meydançası təşkil edilib.

Mədəniyyət və Turizm Nazirliyinin İnformasiya və ictimaiyyətlə əlaqələr şöbəsindən Oxu.Az-a bildirilib ki, yay mövsümü bağlanana qədər hər bazar günü burada Azərbaycan Gənclər İttifaqının, Azərbaycan Rəqs Assosiasiyasının və “Jam SS” studiyasının təşkilatçılığı ilə rəqs həvəskarları üçün pulsuz dərslər keçirilir.

Tədbir milli və müxtəlif xalqların rəqslərinə marağı artırmaq, şəhər sakinləri və qonaqlarının səmərəli asudə vaxt keçirməsinə imkan yaratmaq məqsədi daşıyır.

Tədbirdə milli rəqslər (Nicat İbrahimli), hip-hop (müəllim Andrey Friman), hind rəqsləri (Solmaz Arti), latino (Xəyal Əhmədov və Veronika Talıbova), “Ləzginka” (Vüqar Rəhimov) və zumba (İnarə Mehdiyeva) rəqsləri üzrə dərslər keçirilib.

Hər kəs bazar günü saat 18.00-dan 22.00-dək açıq dərslərə qatıla bilər.

Aytən Sadıqzadə

0
34